Lutf vo ishq me.n paaye hai.n ki jii jaanataa hai

Lutf vo ishq me.n paaye hai.n ki jii jaanataa hai
ra.nj bhii itane uThaaye hai.n kio jii jaanataa hai

jo zamaane ke sitam hai.n vo zamaanaa jaane
tuune dil itane dukhaaye hai.n ki jii jaanataa hai

tum nahii.n jaanate ab tak ye tumhaare a.ndaaz
vo mere dil me.n samaaye hai.n ki jii jaanataa hai

i.nhii.n qadamo.n ne tumhaare i.nhii.n qadamo.n kii qasam
Khaak me.n itane milaaye hai.n ki jii jaanataa hai

dostii me.n terii darapardaa hamaare dushman
is qadar apane paraaye hai.n ki jii jaanataa hai

(Daag Dehlvi)

Gam kii baarish ne bhii tere naqsh ko dhoyaa nahii.n

Gam kii baarish ne bhii tere naqsh ko dhoyaa nahii.n
tuune mujh ko kho diyaa mai.n ne tujhe khoyaa nahii.n

niind kaa halkaa gulaabii-saa Khumaar aa.Nkho.n me.n thaa
yuu.N lagaa jaise vo shab ko der tak soyaa nahii.n

har taraf diivaar-o-dar aur un me.n aa.Nkho.n kaa hujuum
kah sake jo dil kii haalat vo lab-e-goyaa nahii.n

jurm aadam ne kiyaa aur nasl-e-aadam ko sazaa
kaaTataa huu.N zindagii bhar mai.n ne jo boyaa nahii.n

jaanataa huu.N ek aise shaKhs ko mai.n bhii 'Munir'
Gam se patthar ho gayaa lekin kabhii royaa nahii.n

(MUNIR NIAZI)

Itane dino.n ke baad tuu aayaa hai aaj

Itane dino.n ke baad tuu aayaa hai aaj
sochataa huu.N kis tarah tujh se miluu.N

mere andar jaag uThii ik chaa.Ndanii
mai.n zamii.n se aasamaa.N tak ek ang huu.N

aur ujalaa ho gayaa qurbat kaa chaa.Nd
aur gaharaa ho gayaa teraa fusuu.N

ai saraapaa rang-o-nikahat tuu bataa
kis dhanak se teraa pairaahan bunuu.N

saare gul_buuTe tar-o-taazaa hue
duur tak pahu.Nchii hai merii mauj-e-Khuu.N

kar rahe hai.n lamhe lamhe kaa hisaab
mil ke phir baiThe hai.n yaaraan-e-junuu.N

dasht-e-Gam kii dhuup me.n mujh par khulaa mai.n
Khud apanaa saayaa-e-diivaar huu.N

naaz kar Khud par ki tuu hai beshumaar
qadr kar merii ki mai.n bas ek huu.N

(Athar Nafees)

KISI NAZAR KO TERA...............

Kisi nazar ko tera intezaar aaj bhi hai
Kahan ho tum ki yeh dil be-karaar aaj bhi hai

Woh vaadiyan woh fizayain ki hum miley they jahan
Meri wafa ka wahin par mazaar aaj bhi hai !

Na jaanay dekh kay kyon unko yeh hua ehsaas
Ki meray dil pay unhey ikhteyaar aaj bhi hai !

Woh pyaar jiskay liyey humnay chod di duniya
Wafa ki rah pay gaayal woh pyaar aaj bhi hai !

Yakeen nahin hai magar aaj bhi yeh lagta hai
Meri talaash mein shaayad bahaar aaj bhi hai !

Na pooch kitnay mohabbat kay zakhm khayey hain
Ki jinko soch kay dil sogwaar aaj bhi hai !

Kisi nazar ko tera intezaar aaj bhi hai
Kahan ho tum ki yeh dil be-karaar aaj bhi hai !


(Film Aitebaar, sung by bhupinder)